~蕃茄滑蛋煮紅衫魚~

新年過後都好耐冇靚蕃茄買，呢日終於有又紅又大既蕃茄啦，買返幾個煮黎食先，因為蕃茄內含豐富蕃茄紅素。美國哈佛大學實驗報告證明：蕃茄紅素係唯一能降低前列腺癌既食物，所以男士要食多啲啦！另外，蕃茄紅素對於預防肺癌、子官頸癌及抑制腫瘤擴散等等，都有很大既幫助，所以大家老老嫩嫩都要食多啲啦！提提大家，蕃茄需煮熟才能釋放蕃茄紅素，所以要食蕃茄就煮熟啲黎食呀！

雞蛋4隻，加牛奶(2湯匙)、鹽(1/4茶匙)、橄欖油(2茶匙)拌勻。

Le Creuset 淺鍋加油預熱大約1分鐘，熄火下蛋液，由鍋邊四周慢慢向中間撥去，煮成滑蛋，用碟暫時盛起。

淺鍋再加少許油，放蕃茄至鍋中爆香至出水，加入蕃茄醬(50g)及糖(2湯匙)，蓋上蓋煮至蕃茄微爛。

紅衫魚先用鹽及白胡椒粉醃2小時，預熱煎Pan加油，放入紅衫魚煎至金黃熟透。

滑蛋放回蕃茄糊內拌勻。

 再將紅衫魚放入蕃茄蛋內略煮，原煲上餐桌，即成。