~日式昆布木魚大蔥豆腐鍋~

成日打邊爐都係用豬骨、沙爹或食雞煲，呢日不如整個昆布木魚大蔥豆腐鍋試下吖，又昆布又大蔥仲有豆腐添，可以食少啲肉類，對於打邊爐黎講，可以食得健康啲。

材料有昆布(1兩)、大蔥(1-2棵)、小旺菜(1棵)、豆腐(1磚)、木魚碎(隨意)

昆布用水浸軟，洗淨表面雜質，剪寬段。

豆腐切小粒。

大蔥及旺菜斜刀切段。

凍水落昆布煲至水滾。

加入木魚碎煲20分鐘。

再加入適量味噌，少許味琳，再煲10分鐘，暫時完成昆布木魚湯底。是次湯底味噌分量較少，因為用黎打邊爐，海鮮及其他肉類會令湯底變得較咸。如昆布木魚湯係做黎直接飲用，味噌分量可自行調教多一點。

熱鍋加少許麻油(日式湯底貫徹始終，加上用麻油會香啲)，大蔥落鍋爆至微黃。

加入已製昆布木魚湯底，滾起加入旺菜後及豆腐粒，即成昆布木魚大蔥豆腐鍋啦！

就咁食呢個鍋加少許肥牛已經好豐富！呢日仲要打埋邊爐，又有象牙蚌、大蜆同魚，簡直超級滿足。