~豉椒炒大蜆~

想食炒蜆好耐啦！雖然花甲會鮮甜同薄殼好多，但今年啲花甲好多時都好多沙，呢日去海鮮檔買蜆時，見到啲花甲又食好多沙，所以食大蜆啦！

材料有：大蜆1斤、紅辣椒2隻、乾蔥頭2粒、薑絲2湯匙、蒜蓉2湯匙、指天椒1隻(切絲)、豆豉蓉2湯匙、豆板醬1湯匙、紹興酒適量
調味料有：蠔油1湯匙、老抽1湯匙、柱侯醬1茶匙、生粉2茶匙、鹽1/4茶匙、糖1茶匙、白胡椒粉少許、芝麻油少許、水50ml，所有調味汁料拌勻，備用。

做法：
1. 燒熱鑊下大約2-3湯匙食油，爆香乾蔥頭、薑絲、蒜蓉、豆豉蓉及豆板醬；
2. 下蜆略為炒勻，灒酒，加入紅辣椒，蓋一蓋；
3. 加調味汁料，炒至收汁，加指天椒絲，再灒少計酒(增加香味)，炒勻即成。