~屯門醉上海~

位於屯門市中心新都商場2樓10號鋪既醉上海，是屯門市中心一間價錢比較相宜的上海食品餐館，星期一至五(非公眾期假)不收加一服務費，食個快飯都算不錯的選擇。

呢日惠顧左2個午市套餐$82，每碟小菜跟一個白飯同豆漿一柸。

麻婆豆腐，豆腐雖切大件，但滑口而又冇咁容易散晒，算OK，但醬汁似略為濃味的醬油多過麻婆豆腐醬，既不辣又不麻。不過如不是太介意醬汁錯晒的話，味道尚算可以。

回鍋肉就好得多，是正常回鍋肉醬味道，亦有一段上海菜濃油赤醬的感覺，腩肉片薄切，椰菜又炒得剛剛好，不太生又太腍。略嫌菜多過肉好多，不過當下什麼都貴，出街用膳幾十塊錢食得飽又價格相宜已經好難搵架啦！

至於跟餐的豆漿就十分不濟，溫吞水一樣不冷不熱，又沒有豆味，不喝也罷，仲要飲完腸胃有少許不適。好多時喝街上的豆漿比較危險，因為黃豆飲品一煲就即滾，卻並不代表熟透，一定要用小火開蓋慢慢煲至數次滾起才安全。可能食店好多時貪快滾一滾就算了。

評分(5分為最高，0分為最低)：
食品質素 3
衛生狀況 1 (因豆漿出現問題)
店舖服務 4
環境舒適 4
價格合理 3