~鮮茄滑蛋天使麵~

坊間好多專蕃茄麵的食店，食一碗閒閒地都要$40-$60，都唔平架！其實自己整都好容易，仲保証用新鮮蕃茄添。呢次就同大家分享個滑蛋鮮茄蓉天使麵呀！

材料有：新鮮番茄4個(去皮切件)、紫洋蔥半個(去衣切粒)、茄膏3湯匙、鹽少許、糖2湯匙、水適量。

做法：
預熱鍋加油(1湯匙)，爆香洋蔥粒。

加入蕃茄爆香至出水。

再加入茄膏(3湯匙)及糖(2湯匙)，略為爆香。再加入適量水及少許鹽，煮至收汁，即成鮮茄醬。

鮮茄醬炆煮同時煮熱開水，放少許鹽，加入天使麵煮腍。如此同時開始炒滑蛋，加牛奶(2湯匙)、鹽(1/4茶匙)、橄欖油(2茶匙)拌勻。

Le Creuset 淺鍋加油預熱大約1分鐘，熄火下蛋液，由鍋邊四周慢慢向中間撥去，煮成滑蛋。

最後用大淺碟盛起天使麵，麵旁放滑蛋，而麵上方放上鮮茄蓉，即成。呢一日仲整埋忌廉蘑菇湯添。