~墨丸雜菜芝士蛋卷~

屋企用淨一堆食材，每樣食材又唔夠整一款菜式，一於加埋佢試整個蛋卷食啦！

材料有：雞蛋(4隻)、紅橙意大利甜椒(各1小個)、白洋蔥(1個)、墨魚丸(5粒)、芝士(4片)、蔥(少許)。

做法：

1. 雞蛋4隻，加牛奶(2湯匙)、鹽(1/4茶匙)、薯粉水(2湯匙)拌勻。



2. 紅橙意大利甜椒、洋蔥、墨魚丸及蔥，全部切粒。

3. 預熱煎Pan，加橄欖油(2-3湯匙)，先爆香洋蔥粒。

4. 再加入墨魚丸粒煎至微金黃色。

5. 加入紅橙意大利甜椒粒拌勻，落鹽(少許)及黑胡椒粒(適量)。

6. 將餡料加入蛋漿內拌勻 。

7. 長方形煎Pan加油，下蛋漿煎至略為企身。

8. 加入芝士片。

9. 將蛋餅慢慢卷起，煎至蛋香及啡黃色，餡料完全包在蛋卷之中及芝士片已溶化，上碟，表面加上甜沙津醬，即成。